22 de xuño de 2021
Carlos, usuario de Servizo de Atención Psicolóxica da Fundación Amigos de Galicia, cóntanos a súa experiencia.
Como coñeciches o servizo de atención psicolóxica da Fundación Amigos de Galicia? E por que acodes ao servizo?
O servizo de atención psicolóxica de Fundación Amigos de Galicia coñézoo a través dunha amiga dun familiar. Cando enviei a solicitude, no mes de marzo, estaba a atravesar unha etapa dura na miña vida e non me valoraba. Esta situación conlevoume a non coidarme e a non atoparme ben comigo mesmo. Levaba tempo arrastrando pedras de atrás e todo se converteu nunha pelota que eu só non podía xestionar.
Tiveras outras experiencias con profesionais da psicoloxía?
Acudira noutras ocasións a outros profesionais, pero a experiencia non foi boa, sentíame moi xulgado. Coa atención psicolóxica de Fundación Amigos de Galicia sentín desde o primeiro momento moita confianza, e dame outro enfoque na vida que eu non percibira con anterioridade.
Desde que comezaches a terapia co servizo de Fundación Amigos de Galicia notaches algunha mellora?
Ao principio chocábanme moito os exercicios que a profesional que me está atendendo pedíame, pero a medida que fun tendo sesións síntome moito mellor comigo mesmo. A pesar de que as citas foron telefónicas, desde o primeiro momento desenvolvemos unha moi boa conexión entre ambas as partes, é un traballo común, e por fin podo dicir que me volvo a sentir eu.
Ao principio recibía unha atención semanal, aínda que ela sempre me manifestou que está á miña disposición por se necesito algo antes da cita programada. Nestes momentos, e dada a miña melloría, recibo unha atención cada 15 días.
Recomendarías o servizo de atención psicolóxica da Fundación Amigos de Galicia?
Desde logo. Desde o principio notei como me ía liberando dos problemas que arrastraba. Hai moita xente que ten medo a pedir axuda, pero como aprendín ao longo das sesións, hai que ser valente e pedir axuda no momento que o necesitas. Algo que aprendín é que para estar ben coas persoas que che rodean tes que estar primeiro ben contigo mesmo, e isto é algo que traballei moito coa terapeuta da entidade. Estou moi agradecido polo servizo, e podo dicir que despois de buscar moito, por fin atopei a alguén que me axudou a sentirme ben comigo mesmo.
